Ari thyen të gjitha rekordet: Çmimi tejkalon për herë të parë nivelin 5000 dollarë/ons
Çmimi i arit arriti për herë të parë mbi 5 000 dollarë për ons, mes rritjes së pasigurisë globale.
Sot, çmimet e arit u rritën në më shumë se 5 000 dollarë, ose rreth 4 215 euro për ons, duke shënuar një rekord të ri historik, raporton BBC. Rritja vijon një trend të fortë gjatë të cilit çmimi i metalit të çmuar është rritur me më shumë se 60 për qind gjatë vitit 2025. Kjo ecuri vjen në një periudhë tensionesh të shtuara gjeopolitike dhe financiare, veçanërisht mes Shteteve të Bashkuara dhe NATO-s lidhur me çështjen e Groenlandës, duke rritur shqetësimet për stabilitetin global.
Ari si aset i sigurt në kohë pasigurie
Ari dhe metalet e tjera të çmuara konsiderohen tradicionalisht si asete të sigurta, të cilat investitorët i blejnë në periudha pasigurie ekonomike dhe gjeopolitike. Një nga arsyet kryesore të atraktivitetit të arit është rrallësia e tij. Sipas Këshillit Botëror të Arit, deri më tani janë nxjerrë rreth 216 265 tonë ar, ku pjesa më e madhe është prodhuar pas vitit 1950, falë zhvillimit të teknologjisë së minierave dhe zbulimit të depozitave të reja.
Rezervat dhe perspektiva e furnizimit
Shërbimi Gjeologjik i Shteteve të Bashkuara vlerëson se rreth 64 000 tonë të tjera ar mund të nxirren ende nga rezervat nëntokësore, megjithëse furnizimi me këtë metal parashikohet të stabilizohet në vitet e ardhshme, duke ruajtur presionin mbi çmimet.
Rritje rekord edhe për argjendin
Ndërkohë, edhe argjendi ka shënuar një rekord të ri, duke kaluar për herë të parë nivelin 100 dollarë për ons, që është e barabartë me 28.3 gramë. Çmimi i argjendit ka vijuar një rritje të fortë prej gati 150 për qind gjatë vitit të kaluar, duke reflektuar interesin në rritje të investitorëve për metalet e çmuara.
